「萬般帶不走，入落我戶口。」選過立法會嘅鍾琬媛（Bonix）日前話會離開「熱狗」，不過佢喺《熱血時報》條課金link（連結）到噚日依然如常運作，有網民試過都仲係可以課到金畀佢，講到尾都係唔捨得啲錢，網民「James Leung」就寸佢「掟煲未掟蓋」。
今次Bonix「退熱」，俾唔少「反熱」網民大肆褒揚，又讚返佢「女神」又盛，但係「反熱」facebook專頁「香港癲佬力量」就覺得唔使咁做，因為「熱狗」同「城邦派」喺過去一年不停玩清算，仲大肆侮辱支持「青年新政」同「本土民主前線」等佢哋口中嘅「偽港獨」嘅女性，好似經常出性感相嘅中文大學學生會幹事會前常務幹事黃于喬（圓咕碌），同埋網媒《100毛》嘅「偽人」、原名柯翠婷嘅「盤菜瑩子」，Bonix無可能唔知情，「為佢臉上貼金就不必喇，不過亦都唔會窮追猛打。極其言，佢只係及時明哲保身，冇乜嘢值得敬佩與欣賞。」
「Kuku Chiu」更加覺得唔夠喉，唔應該只係為Bonix貼金，「當×蟲太（鄭松泰）四眼（鄭錦滿）等人以沉默回應黃毓民，人人讚好！點解敗選一年後『女神』退黨想佢交代下（吓）就唔得？因為佢靚女啲？ 佢過去一年反應同表現跟四眼有乜分別？ 四眼都無直接參與清算啦！」
神駒「邀約」被潑冷水
之前不時有「退熱」者打上去「無敵神駒」仇思達個直播度數「熱狗」不是，好似「法國佬」張珈衍同「無待堂堂主」盧斯達，神駒今次想食埋條水，喺fb叫Bonix聽晚打上去爆料。不過班「益友」意見參半，「陳麒麟」就話Bonix只係一個普通女仔，希望過返正常生活，「希望大家不要再叫她『女神』，她只是一個普通女仔，佢無神蹟的。」「Nobu Kwan」亦都潑冷水：「佢點可能打畀你吖，點睇佢都係『和平退熱』。」■香港文匯報記者 陳庭佳