梁振輝 香港資深出版人
某天，阿恩與新紥師兄的輝仔「行孖咇」。
輝仔：師姐，我「初嚟埗到」（初來乍到），有乜「唔啱唔着」（不對的行為） ，請多多指教！
阿恩：「行咇」呢啲手板眼見功夫，好易上手啫！但做到唔畀人覺得係擾民就有啲技巧嘞！
輝仔：師姐，咁你就快啲過兩招過嚟喇！
阿恩：冇錯，光天化日或者大街大巷，如果隨便搵個人查身份證，講真，係冇乜實質意義，唔怪得畀人「詐型」（埋怨或責罵）嘅！所以，我哋對眼要好似探射燈咁，掃下條街邊度有可疑人物囉！
輝仔：可疑人物？唔會喺「額頭上面鑿住」（把身份刻在額頭上）個喎！咁點分呀？
阿恩：咪就係喺唔適當嘅時候，出現喺唔適當嘅地方，做啲唔適當嘅嘢囉！
輝仔：好玄啫！
阿恩：有幾？好似半夜三更響墳場附近留連咁囉！
輝仔：我諗我明嘅！
阿恩：嗱，而家凌晨兩點幾，馬路對面嗰間銀行有條友喺櫃員機度摸高摸低......
輝仔：仲唔係想撬開個櫃員機，過去「踢竇」囉！
阿恩：睇睇附近有冇同黨先，咪得咁魯莽！
輝仔：係嘅，Madam！......周圍冇乜動靜喎......
阿恩：做嘢！
輝仔：先生，「撳錢」（提款）呀？
中年漢（語帶猶豫）：係，係......
阿恩：先生，攞個身份證出嚟睇下！
中年漢：正話先喺隔籬街畀差佬「盤」完，而家又嚟畀你哋「逗」多嘢，真「黑仔」（當黑）！
阿恩：先生，撳錢使唔使摸上摸落呀？
中年漢：冇帶個老花眼鏡，咪摸嚟摸去囉！
輝仔：Madam，check咗Ok！先生，冇嘢嘞！
阿恩：咪住，個背囊裝啲乜嘢？打開嚟睇下！
中年漢（抱緊背囊且語帶怒氣）：冇嘢睇！
輝仔：先生，鎮定，請你合作！
中年漢突然發難，說時遲那時快輝仔已把他按在地上，並把他的手反鎖在背後。阿恩隨即打開他的背囊，赫然發現一把牛肉刀和一支鐵筆。
阿恩：把刀愛嚟「劈友」（斬人）㗎？
輝仔：支鐵筆仲唔係愛嚟撬嘢！
中年漢：我冇嘢講，咪「的」我番去囉！
阿恩：好！同我「塔」佢番去！
回到警察局。
「坐堂」（報案室的當值主管）：喺邊度「周」個大叔番嚟呀？
阿恩：自己游埋嚟嘅，哈哈......
「行咇」時，「老散」會對市民，大多為可疑人物詳加探詢，亦即盤問，俗稱「盤」，作用是了解其當時的狀態、行為的可能傾向，甚或在有意無意間套得一些偵破某些案件的線索。
「戥」，讀「鄧」，是一種小型的秤，用來稱金、銀、珍貴藥材或重量較輕的東西。如用「戥」稱一包藥，人們會說把這包藥「戥一戥」；對於一些行內老手，只要把它放在手上「戥一戥」，他們已可告知它的大概重量。人們也會把「戥一戥」讀成「逗一逗」：
戥/dang6；變韻母→豆/dou6
對物件而言，「逗」這個行為有衡量其輕重的意思；若然對人而言，這個行為就是「睇下佢有幾多斤兩」，亦即試圖摸摸其底細。差人說的「逗下某人」也就是把他/她盤問一番的意思，所以「逗」「盤」所起的作用相同。
除了「盤」和「逗」這兩個進行盤問時的用詞外，近年警務人員多會用「踢竇」這個詞。在大多數人的印象中，「踢竇」妻子，多連同「好姊妹」（閨密）到丈夫與「小三」（情婦）同居之「窩」捉姦、鬧事、興師問罪。可能因為這是一個突擊且揭示罪行的行為，所以「踢竇」一詞便被借用。然而，不是每次「踢竇」也會「踢中」，即被踢的人物可能是一等良民，只是其當時的表現有可疑而已。
查「的某人番差館」中「的」的本字是「扚」，其一般的意思是用一隻手或兩隻手指尖相對握着。除這兩個意思外，「扚」還有「拉」的意思，那「扚某人番差館」就是指把那人「拉」回差館，亦即把那人帶返警署調查。
如已掌握某人的犯罪證據，警方有權或可下令「周佢番嚟差館」，即把該人拘捕歸案，當中的「周」的本字是「抽」。查「抽」也有「拉」的意思，通過以下音變，「抽」便讀成「周」：
抽/cau1；變聲母→周/zau1
如此看來，「拉」、「的（扚）」、「周（抽）」同義。
在逮捕的過程中，如疑犯被認為有機會逃走或作出反抗，當場的警務人員可對其「上孖葉」（鎖上手銬），亦即「鎖佢番去」，老差骨多會說成「塔佢番去」。查「塔」的本字是「錔」，作為名詞時，「錔」指金屬套，如筆錔；作為動詞時，「錔」有套上、裹着的意思。廣東人會叫舊式的「鎖」做「錔」，「把門關好」做「錔好/錔住/錔實度門」，後者的「錔」就有鎖上的意思。
【專欄簡體版】https://leoleung2016.wordpress.com/