疫情影響下，「限聚令」不斷延續，令大眾娛樂場所，包括戲院繼續關閉，有見最近單日確診人數開始回落，甚至出現零感染，電影業復甦的機會便大增。在期待戲院重開，一套令人開懷大笑的電影會比較適合。今年，泰國年度四大賣座之一的喜劇《又要威，又要除頭盔2》（Bikeman 2，見圖）便是其中一套。
《又要威，又要除頭盔2》去年贏得泰片年度開畫票房第三名，是繼《出貓特攻隊》（Bad Genius）、《大佬可以退貨嗎？》（Brother of The Year）及《去吧！女神兵團》（Friend Zone）後，另一套泰國喜劇出位作！上集講到男主角偉霆（Peach飾）本身揸的士，但又呃阿媽自己做銀行經理，點知最後居然真的轉行做銀行仔，還成功踢走女神男友，與女神樂童（Fon飾）愈行愈埋。今集偉霆與樂童繼續於大銀幕擦出愛火花，還要克服情侶最大的恐懼──見家長！新加盟的泰國「三哥」Somchai Khemklad（Tao飾）原本真人勁瀟灑，亦不惜犧牲型佬外表，化身「非常外父」，換上Barcode禿頭兼一臉惡形惡相，玩殘未來女婿一家。三人聯同一眾泰國紅星班底的無厘頭搞笑演繹，再加上貼地的劇情，呈獻出一套為觀眾醒醒神、打打氣的輕鬆小品。
為追女神，唔做的士仔；為氹未來外父......竟然又戴返頭盔？一直做兵仔嘅偉霆終於等到女神樂童分手，仲畀佢撞正絕佳機會食住上：樂童爸爸沙膽由鄉下殺到嚟，迫樂童回鄉相睇；為咗耍走阿爸，樂童哀求偉霆扮自己男朋友，仲叫佢帶埋全家一齊見家長。偉霆阿媽花姐、世叔伯鼎爺同死黨戇呃等人，齊齊夾計扮鬼扮馬，誓要冧掂惡到爆嘅未來外父；可惜個個騎呢百出，結果搞到一鑊粥！本以為外父政策行唔通，誰不知沙膽突然惹上大麻煩，偉霆即刻戴返頭盔、出動「野狼的士GO」，救外父之餘，唔通可以順手抱得女神歸？
這些日子，應該為自己心情打打氣，加點歡笑，《又要威，又要除頭盔2》是不錯的選擇。 ■文︰徐逸珊